Langyaw nga resort manager sa Moalboal gikawatan
CEBU, Philippines - Gituohang inside job ang pagpanglungkab sa kuwarto sa general manager sa usa ka beach resort sa Saavedra, lungsod sa Moalboal nga nadiskubrehan sa nakalabay nga kadlawon.
Kini sumala pa ni PO3 Esteward Bayang, imbestigador sa Moalboal Police Station.
Nasayran nga ang lawak sa Australian nga general manager nga si Matthew Simon, 44, ang gilungkab ug nakuha ang salapi’ng cash kantidad og P51, 389 ug $532.
Matud pa ni Bayang nga kung tan-awon og maayo ang nahitaboan daw duna gyu’y inside job diin ang kawatan niagi sa bintana pinaagi sa pagtangtang sa mga jalousie blades.
Nabantayan ni Bayang nga ang pinakaubos nga jalousie blade wala natangtang nga kung tinuod pa nga sa bintana niagi ang manglungkabay, natumban unta ang maong jalousie blade ug nabuak.
Laing nabantayan mao nga ang pagtangtang sa lock sa jalousie blades gikan sa sulod sa kuwarto.
“Posible kaayo nga sa main door niagi ang kawatan unya niabli sa bintana, usa ra ang naghawid sa yawe ang tag-iya ra sa kuwarto,” matud ni Bayang. Nakapasamot sa pagduda ni Bayang ang wala pag-apil og kawat sa mga cellphones ug laptop.
“Gibogoan seguro sila sa polis sa Moalboal sir, kung ako’y kawatan dalhon nako to’ng cellphone ug laptop lusot ko sa likod kay kalibunan didto paingon sibat,” dugang ni Bayang.
Usa sa gusto’ng masayran sa kapolisan kung wala ba nakadispalko og kuwarta ang general manager sa maong resort kinsa wala pa nakig-alayon sa kapolisan.
Dili na sab bag-o alang ni Bayang ang mao’ng hitabo kay duna na’y mga langyaw nga magpa-blotter ug moingon nga nabiktima sa pagpangawat ug dayun mokuha lang og police report aron maka-claim og insurance. (Jojo C. Ugdol/GMR)(BANAT NEWS)
- Latest
