CSBT way building permit

CEBU, Philippines - Ang kagamhanan sa probinsiya sa Sugbo dili makapahigayon sa three phase nga koneksiyon sa linya sa kuryente sa Cebu South Bus Terminal (CSBT) tungod kay wala kini building permit matud sa bag-ong operation manager nga si Ramon Dumayac.

Sa gipahigayong Kapistorya sa Kapitolyo kagahapon sa buntag si Dumayac nagkanayon nga naglibog siya sa sitwasyon tungod kay kung wala’y building permit wala usab unta kini occupancy permit mao nga dugay na kining  nag-operate isip usa ka terminal.

Ang maong proyekto apil kini sa major renovation sa terminal aron butangan pagbalik og mga aircondition unit. Wa maesplikar ni Dumayac kun nganong kaniadto nakataod og aircondition units ang CSBT nga wala man kini kaniadto kompletong papeles.

Ang Provincial Information Officer nga si Ethel Natera kinsa tigpamaba sa Visayan Electric Company (VECO) miiingon nga una motaod og dugang transformers o mag-update sa linya sa kuryente ang usa ka edipisyo kinahanglan una kini og building permit, occupancy permit ug electrical permit.

Dugang ni Natera nga niadtong higayon nga natukod ang terminal gamay pa kini og konsumo hinungdan nga single phase ang koneksiyon niini sa kuryente. (Brenda D. Batuto/EIM)(BANAT NEWS)