Gun ban giuswag sa Abril 10

CEBU, Philippines - Dili madayun ang pagpatuman sa gun ban karong adlawa sa gikatakda nga eleksiyon sa Sangguniang Kabataan.

Giuswag sa Commission on Elections ang gun ban ug election period sa SK election sugod sa Abril 10, 2015 pinasikad sa Comelec En Banc Resolution No. 9934.

Matud ni provincial election officer, Ferdinand Gujilde, nga wala mauswag ang SK election nga gikatakda karong Abril 25 apan gipamub-an ang election period.

Ang House Bill No. 5209 nga nag-uswag sa SK election sa 2016 nadawat sa Office of the President niadto’ng Marso 4, 2015 ug wala pa napirmahi hangtud karon.

Gipasabot ni Gujilde nga karong Abril 4 takdo usa na ka buwan human naduso ang balaudnon nga kung dili mapirmahan sulod sa 30 ka adlaw, awtomatik na kini’ng mahimo’ng balaud.

Matud ni Gujilde nga kung i-veto sa Presidente ang balaudnon, pwede sab kini’ng ma-override sa Kongreso. Ang Comelec nanagana nga wala’y “legal complications” hinungdan nga gipamub-an lang ang 30 ka adlaw nga election period sa SK ngadto n alang sa 15 ka adlaw. Ang pagsang-at sa Certificates of Candidacy (COC) sa mga molansar sa SK election kung madayun gyud gikatakda karong Abril 11, 13 ug 14 samtang ang campaign period sulod lang sa siyam ka adlaw gikan sa Abril 15 ngadto sa 23.  (BANAT NEWS)