Tukuron nga building kinahanglan lig-on

CEBU, Philippines – Kinahanglan nga lig-on na ang pangtukuron nga mga edipisyo sama sa eskwelahan nga makasugakod sa mga kalamidad sumala pa sa Provincial Disaster Risk Reduction Management Office (PDRRMO).

Ang pangulo sa PDRRMO, Baltazar Tribunalo, niingon nga ang mga edepisyo kinahanglan nga moagi og risk assessment pagseguro nga dili maguba kung may katalagman.

Matud ni Tribunalo nga ang mga pribado’ng sektor kinahanglan nga apil sa implementasyon sa disaster risk reduction programs.

Subay niini, si Tribunalo nagkanayun nga angayang ipadayun ang pagpaningkamot sa mga munisipyo nga ma-integrate ang disaster risk reduction sa matag lokal nga kagamhanan.

Matud ni Tribunalo nga unta ang matag lokal nga kagamhanan duna’y buhatan sa disaster risk reduction, duna’y mga opisyal, duna’y risk assessment, duna’y plano sa resulta sa risk assessment ug i-integrate gyud ang risk ngadto sa plano.

Dugang ni Tribunalo nga ang Swiss Development Agency nagplano sa pagsuporta sa Sugbo kabahin sa risk reduction training lakip na sa ekipo sa pagpangandam alang sa katalagman. – /GMR) (BANAT NEWS)