Mga kurso sa TCC may pagtugot sa CHED

CEBU, Philippines – Hugot nga gibarugan ni Dr. Edgar Martinez, caretaker sa Talisay City College (TCC) nga legal ug nituman sila sa mga pangayo sa Commission on Higher Education.

Kini bisan sa pamayahag sa CHED-7 nga wala’y pagtugot ang pipila ka kurso nga gitanyag sa TCC.

Gipakita ni Martinez sa media ang mga dokumento gikan sa CHED sa pagpamatuod nga may pagtugot ang tanang kurso nga gitanyag sa TCC gikan sa undergraduate ngadto na sa graduate program.

Ang pagrehistro sa mga kurso gihikay sa Cebu Technological University (CTU) isip allied school sa TCC.

Nakugang na lang si Martinez sa nanggawas nga balita nga nagkondenar sa TCC ang CHED gumikan kay wala’y permit ang mga kurso nga gipangtanyag hinungdan sa kabalaka sa mga ning-graduate sa ilang status.

Hangyo ni Martinez sa CHED-7 nga unahon ang TCC sa pagpahibawo sa dili pa ang media gumikan kay makahatag kini og daku’ng alarma sa mga estudyante ug ginikanan.

Andam si Martinez modangop sa Board of Trustees (BOT) sa TCC sa panahon nga adunay ipadangat nga kausaban ang CHED sa mga programa.

Samtang nipadayag sa iya’ng kasagmuyo ang pangulo sa TCC, Mayor Johnny delos Reyes, sa CHED gumikan kay karon lang gikwestiyon ang authority sa TCC nga motanyag sa ilang mga kurso sulod sa iya’ng administrasyon.

Hangyo ni delos Reyes sa CHED nga tabangan ang TCC sa angay buhaton aron mas molambo pa.

Gipasalig hinuon ni Martinez sa publiko nga legal ang TCC ug wala’y dapat ikabalaka ang mga ni-graduate ug ang mo-graduate sa mga kurso niini. – /GMR) (BANAT NEWS)