Taga HPG-7 gitaktak sa serbisyo
CEBU, Philippines – Gitangtang sa serbisyo ang kanhi mga opisyal sa Highway Patrol Group-7 nga akusado sa pagbanhig patay kang Atty. Noel Archival ug kaubanan.
Matud ni Atty. Rameses Villagonzalo, abogado sa bugtong nakalingkawas sa hitabo nga si Paolo Cortes, nga nadawat niya ang kopya sa kamandoan gikan kang Talamban barangay konsehal Nelson Archival, igsuon ni Noel.
“Latest from Camp Crame… Senior Superintendent Romualdo Iglesia, Senior Inspector Joselito Lerion and PO1 Alex Bacani are now dismissed from the service,” ang text message gikan ni Villagonzalo.
Matud ni Villagonzalo nga ang maong special orders nakatabang sa ila’ng kaso batok sa tulo sanglit namatud-an nga absent without official leave (AWOL) ang mga opisyal.
Niadtong Disyembre 12, 2014, gi-served sa National Bureau of Investigation ang warrant of arrest batok sa tulo sa kasong multiple murder ug frustrated murder apan wala na sila sa Personnel Holding and Accounting Section (PHAS) sa HPG sa Camp Crame sa Quezon City.
Ang pagtangtang kang Iglesia, Lerion ug Bacani sa han-ay sa kapolisan giingong niepekto niadto’ng Enero 26, 2015 ug ang special orders gipirmahan nila’ng Police Director for Personnel and Records Management Jaime Hermo Morente niadto’ng Marso 10, 2015.
Si Atty. Inocencio dela Cerna, abogado ni Lerion, nagdumili una sa pagluwat og pamahayag sanglit wala pa siya kadawat sa maong dokumento. – /GMR) (BANAT NEWS)
- Latest
