Poultry nasunog, 5 mil ka manok litson
CEBU, Philippines – Mokabat sa 5,000 ka manok ang nalitson human naugdaw sa sunog ang usa ka poultry farm sa barangay Ocoy, lungsod sa Santa Fe, isla sa Bantayan pasado alas 2 sa nakalabay nga hapon.
Ang maong poultry farm gipanag-iya ni Domingo Zaspa, 69.
Matud ni Sr. Insp. Romeo Caacoy, hepe sa Santa Fe Police Station, nga arson ang usa sa mga anggulo nga ilang gitan-aw nga motibo sa maong hitabo.
Sa pamahayag sa anak sa tag-iya nga nakabantay kini nga dunay usa ka lalaki ang midagan palayo sa ilang poultry farm apan gibaliwala lang sa nakakita gumikan kay gikoral ang lugar apan pipila ka minutos ang nilabay kalit lang niulbo ang kayo.
Usa sa problema sa kapolisan kay wala’y fire truck ang lungsod ug motawag pa sila og tabang sa lungsod sa Bantayan Fire Station nga mobiyahi pa og 20 hangtud 30 minutos.
“Kung ingon ana ka dugay nga travel sa fire truck unya light materials ang poultry farm, ugdaw na inig abot sa bombero. Saon man wala man mi bombero diri,” matud ni Caacoy.
Usa sa gisubay ang anggulo sa politika kay politiko ang tag-iya nga pamilya sa maong poultry farm apan wala sab nila gipadaplin ang personal nga motibo.
Ang maong sunog nagbilin og P5 milyones nga danyos dala sa imprastraktura ug mga manok. – /GMR) (BANAT NEWS)
- Latest
