Kapolisan wa pay lead pagpusil sa manag-inahan

CEBU, Philippines – Nitabang na ang mga sakop sa Investigation Detection and Management Bureau (IDMB) sa Presinto 4 sa Mandaue City Police Office (MCPO) kabahin sa pagpamusil sa usa ka dalagita ug sa inahan niini diha sa Barangay Banilad, dakbayan sa Mandaue.

Ang hepe sa Station 4 nga si Senior Inspector Hugo Tio Epong maoy nangulo sa imbestigasyon pag-ila sa mamumuno sa mga biktima nga sila si Kim Patenio, 15 ug inahan nga si Presilla, 54.

Ang duha pulos gipamusil sa ulo sa usa ka lalaking nagsakay og mountain bike. Patay dihadiha ang dalagita nga maoy gituohang puntariya sa gunman samtang nalandig sa tambalanan ang inahan niini. Gisusi karon sa mga imbestigador ang mga mensahe sa inbox sa cellphone sa dalagita nga giingong daghang death threats nga nadawat.

Nagsugod na usab pagpanghipos og kopya sa video footages sa mga CCTV cameras sa palibot sa crime scene sa tinguhang mailhan ang gunman. – /EIM) (BANAT NEWS)