Tigbakay sa Talamban

CEBU, Philippines – Hepe sa Talamban Police Station gibaharang relibohan kun dili kini makapakgang sa problema sa tigbakay diha sa iyang hurisdiksyon.

Ang kamanduan gihatag sa Officer-in-Charge sa Cebu City Police Office nga si Senior Superintendent Marciano Batiancila kinsa bag-ohay lang milingkod isip hulip kang Senior Superintendent Conrad Capa. Ang hepe sa Talamban Police Station nga si Senior Inspector Bienvenido Miral nga nahinabi sa Banat News mibutyag nga gitawgan siya sa cellphone sa bag-ong OIC sa CCPO ug gipaabot ang maong kamanduan.

Giangkon ni Miral nga aduna gyu’y tigbakayan sa mga dapit nga sakop sa iyang hurisdiksyon ilabi na sa bukirang mga barangay sama sa Pit-os, Highway 77, Agsungot, Guba ug Pulang-bato.

Apan problemado sila pagpatrolya niining mga dapit tungod sa kalisod sa sakyanan kay ang bag-o nilang patrolcar dili man pangbukid, pirme lang silang maikyasan sa mga sugarol.

Sa interview sa Banat News kang Batiancila kini mipasabot nga ang iyang kamanduan pahimangno lamang ug miangkon nga wa siya’y gahom makaparelibo og usa ka polis kay OIC lang ang iyang kapasidad. “That order serves a warning kay daghan naman gud ‘kong nadawat nga reklamo sa tigbakayan diha nga lugar. That’s why gitagaan nako siya og order to stop sa tigbakayan,” matud pa ni Batiancila.  Giklaro ni Batiancila nga di lang si Miral ang iyang gihatagan og verbal orders apan ang kadaghanan pulos bahin sa kampanya kontra ilegal nga drugas. Ang Talamban Police inabagan sa Cebu City Public Safety Company ug Mobile Patrol Group mironda dayon sa Highway 77 ug sa barangay Pit-os human nakadawat og report bahin sa tigbakayan apan sa ilang pag-abot wala nay mga sugarol sa maong mga lugar. – /EIM) (BANAT NEWS)