“Manyakis” nga tulisan nanglugos og bata nadakpan

CEBU, Philippines – Gipasanginlang “manyakis nga tulisan” nadakpan na g’yud sa kapolisan samtang mibiktima na usab unta og usa ka 13-anyos nga batang babaye diha sa Barangay Pagsabungan, sa dakbayan sa Mandaue niadtong Sabado.

Ang suspetsado giila nga si Roy Cellona, 27, taga Dawis Norte, sa lungsod sa Carmen.

Ang pagkadakop sa suspetsado natigayon human sa hot pursuit operation nga gipangulohan sa hepe sa Presinto 3 nga si Senior Inspector Genilo Veraque  diha sa sulod sa usa ka fastfood chain sa Barangay Lamac, sa Liloan.

Si Police Officer 1 Peter Martinez sa kapolisan sa Presinto 3 sa MCPO miingon nga nakuhaan ang suspek og  usa ka kalibre .45 pistola nga adunay lima ka mga buhing bala.

Matud pa ni Martinez, usa ka 13- anyos nga batang babaye nga naghilak ang midangop sa ilang buhatan ug mialigar nga gilugos kini sa usa ka lalaki nga nagpailang polis. Matud pa sa bata kalit misulod ang suspek sa ilang balay ug nangukay sa ilang mga butang kay kuno nakadawat kini og taho nga nagtago sila og shabu sa iyang mga ginikanan.

Niadtong tungora, wala diha ang mga ginikanan sa biktima ug giingong gitawag siya sa maong suspetsado sa pagpasulod sa kuwarto ug didto gitionan kini og armas ug gilugos.

Pagkahuman niini dali nga nigawas ug misakay sa motorsiklo ang suspek ug misibat pahilayo.

Human sa paghulagway sa biktima sa suspek, nagduda dayon ang mga polis nga mao kini ang tulisang manyakis nga ilang gipangita human nitulis ug nagduwa sa iyang kinatawo atubangan sa ginang nga iyang gitulis diha gihapon sa maong barangay (Tabok).

Gamit ang cellphone number nga gipabutangan sa suspek og load dihang gitulis niini ang ginang sa Tabok, gi-teksan kini sa mga polis ug nagpatuong usa kini ka babaye nga buot makigkita kaniya sa usa ka fastfood chain sa Consolacion.

Tungod ba kaha sa pagtuong babaye ang iyang ka-text misugot ang suspek ug nakigkita unta sa iyang ka textmate apan mga polis na diay kadto hinungdan sa pagkasikop kaniya.

Nasayran nga positibo usab siya nga maoy nitulis sa panimalay sa usa ka abogado diha sa Liloan apan wa lugosa ang katabang, duna pay gisubay ang kapolisan nga mga pagpanulis nga giingong binuhatan sa suspek sa Dakbayan sa Danao ug pipila ka lungsod sa amihanang bahin sa Sugbo. Matud pa ni Martinez giangkon sa suspetsado ang maong mga krimen. – /EIM) (BANAT NEWS)