Igsuon sa PBA Kia player nga napriso sa CPDRC naangol
CEBU, Philippines – Usa ka piniriso sa Cebu Provincial Detention and Rehabilitation Center (CPDRC) ang nalandig sa tambalanan human milayat gikan sa viewing deck sa prisohan niadtong Sabado sa hapon.
Si Joven Poligrates, 37 anyos, taga-Poro sa isla sa Camotes, nakaangkon og dakong samad sa ulo human milayat ug mitugpa sa semento.
Gibutyag ni Marco Toral, ang consultant sa jail management, nga nahitabo ang insidente pasado alas 4:00 sa hapon human nga mibisita ang asawa niini.
Gisaysay niya nga human mibiya ang asawa, mikalit og paniko si Poligrates sa mga kaubang priso ug mikatkat sa viewing deck sa CPDRC.
“Pina-dive daw ang paglukso. Maayo gani pagtugpa niya naigo pa siya sa abaga sa usa ka piniriso unya sa semento, pwerting pagkasamara sa ulo,” matud ni Toral nga nahinabi sa Banat News.
Human sa panghitabo, gidala sa Vicente Sotto Memorial Medical Center si Poligrates. Niining pagsuwat, matod ni Toral nga anaa na sa trauma center ang biktima.
Bag-ohay pa lang napriso si Poligrates sa kasong rape pipila ka semana lang ang milabay. Sigon ni Toral nga daan na nga “depressed” si Poligrates ug gani gibutang kini sa balkonahe.
Sa laing bahin, si jail warden Romeo Manansala, sa dihang gipangutana kini kun aduna bay guwardiya nga nagbantay sa viewing deck, nagkanayon sa mensahe nga gipadala sa Banat News nga “Gibadlong na ‘to sa guwardiya pero kalit lang milayat.”
Gikompirmar usab ni Toral nga ang maong piniriso igsuon sa basketbolistang si Eliud “Eloy” Poligrates sa KIA Carnival sa Philippine Basketball Association. – /EIM) (BANAT NEWS)
- Latest
