Bakuna batok sa sakit sa hayop sa ting-init

CEBU, Philippines - Gisugdan na sa Talisay Veterinary Office ang pagpamakuna sa mga hayop sama sa baka, kabaw, kanding ug karnero aron malikay sa makamatay nga sakit bunga sa kainit sa panahon gumikan sa dry season nga gisamotan pa sa mild  El Niño phenomenon.

Ang sakit nga gitawag nga Hemorrhagic Septicemia  sagad motumaw sa panahon sa ting-init  kun grabe ang pagluya  sa mga hayop tungod sa kainit sa panahon. Sumala pa nga hilantan ang mga hayop, magluya, sip-onon ug di na katindog gumikan sa hubag-hubag sa lawas niini.  Matud ni Dr. Santiago Holter, DVM nga sagad kadto lamang mga hayop nga mokaon og sagbot ang sagad mataptan sa maong sakit.

Sumala pa niya, sud lamang sa 48 ka oras kung di dayon mabantayan ug mahatagan og tambal nga antibiotic ang maong sakit mamatay ang hayop gumikan sa kaisog sa virus.  Gihulagway ni Holter ang Hemorrhagic septicemia nga usa ka intestinal bleeding hinungdan nga sa matag kalibang sa hayop adunay dugo nga masagol sa hugaw niini.

Basi sa pagtuon sa mga batid nga doktor sagad kini mosiaw ang hemorrhagic septicemia sa mga lugar nga grabe kataas ang temperatura sa kainiton sa panahon.

Dinhi sa Sugbu aduna nay natala nga kaso susama niini gumikan sa kakuwang sa igong impormasyon sa mga nanag-iya sa hayop ilabi na ang mga kabaw ug baka  nga pasagdahan lamang kini bisan asa ipangtugway ubos sa kainit sa panahon.

Giangkon ni Holter nga walay animal clinic sa Sugbo alang sa mga dagkong mga hayop gumikan sa kamahal sa mga pasilidad niini, apan mapugngan ang sakit kun mabakunahan ang mga mananap.  (BANAT NEWS)