Daghang kababayen-an pa ang naabusahan
CEBU, Philippines - Si Camarines Sur Kongresista Leni Robredo , biyuda ni anhing interior secretary Jesse Robredo miingon nga daghan pa gihapong kababayen-ang giabusaran apan nagpabiling nagpakahilom tungod ug alang sa ilang mga anak.
Si Robredo maoy pinasidunggang dinapit kagahapon sa 5th Women’s Congress sa probinsiya miingon nga kinahanglan ang “women empowerment.” Matud niya nagpasabot kini nga ang babaye duna kini samang katungod sa kalalakihan.
Apan miangkon si Robredo nga daghan gihapong mga babaye ang gipang-abuso sa kaugalingon nilang mga bana apan nagpakahilom lang ug miagwanta sa maong pangabuso tungod kay mahadlok kining biyaan tungod sa ilang mga anak.
Gidasig ni Robredo ang mga lokal nga kagamhanan nga hingusgan pa ang mga livelihood programs alang sa kababayen-ang giabusaran ug tabangan silang makakwarta gikan niini. Sa iyang bahin, si Gobernador Hilario Davide III nagkanayon nga daku og papel ug impluwensiya sa komunidad ang kababayen-an ug mahinungdanon nga sila makakuha og edukasyon.
Ang gobernador mipaambit sa panultihon sa mga educator nga nagkanayon “educate a man and you educate that one man, educate a woman and educate a family.”
Samtang gibutyag ni Bise Gobernador Agnes Magpale, chairman sa Provincial Women Council (PWC) nga aduna karoy 153 ka mga kaso sa pagpangabuso sa kababayen-an ang giatiman sa ilang buhatan.
Gibutyag ni Magpale nga walo ka mga suspetsado na ang ilang napapriso ug napasakaan og kaso ngadto sa korte.
Gawas niini, laing unom ka suspetsado nga mga langyaw ang napasakaan usab og kaso diin duha niini ang nakabutang og piyansa alang sa ilang temporaryong kagawasan, usa ang napaubos sa “hold departure order”, usa ang padayong gipangita, usa ang na-deported ug laing usa ang nakonbikto. (BANAT NEWS)
- Latest
