Bata patay, inahan kritikal

CEBU, Philippines - Patay ang usa ka 15-anyos nga dalagita samtang kritikal ang inahan niini human sila pamusila sa wala mailhing tawo nga nagbisekleta samtang ang duha luwan sa usa ka pasaheroan diha sa Banilad, Mandaue City.

Ang namatay mao si Kim Patenio, 15 anyos, samtang naangol ang inahan niini nga si Prescilla, 54, pulos mga molupyo sa Sitio Tikyan, Banilad sa maong dakbayan. Sumala pa sa imbestigasyon sa kapolisan, ang drayber sa pasaheroang multicab nga gisakyan sa mga biktima nga si Almer Aurit mibutyag nga ang duha lang ang iyang pasahero padung sa Banilad, Cebu City.  Matud pa nga dunay usa ka mountainbike nga kalit mitupad kanila ug gipamusil ang mga biktima. Unang gipusil ang bata ug gisunod ang inahan. Ang duha pulos naigo sa ulo.

Ang duha daling gidala sa Vicente Gullas Memorial Hospital sa Banilad apan gideklarar ang bata nga dead on arrival. Nakuha sa crime scene ang duha ka basiyo sa .9mm nga bala.

Sumala pa ni Police Officer 1 Juanito Libres sa Station 4 sa Mandaue City Police Office ang mamumuno nagsuot og ski mask ug nagsuot og itom nga jacket luwan sa usa ka mountainbike daling nisibat human sa hitabo.

Ang kapolisan nakakita og text messages sa cellphone sa bata nga daghan kining nadawat nga death threats. (BANAT NEWS)