Pito ka MCPO stations gitinguha

CEBU, Philippines - Gitinguha ni Mayor Jonas Cortes nga dugangan ang police stations sa Mandaue City Police Office (MCPO) aron mahimo’ng pito.

Nagpadayun na ang pagtukod sa police station sa may dalan A.S. Fortuna, barangay Bakilid, duol sa daku’ng mall sa maong dapit.

Matud ni Roger Paller, public information officer sa dakbayan, nga ubos sa plano sa mayor mao nga ang gitukod nga building alang sa pagbalhin sa Police Station 2 sa Barangay Hall sa Subangdaku  ang magsilbi’ng ikapito nga presinto.

Magpabilin sa iyang nahimutangan ang buhatan sa kapolisan sa Presinto 2 sa Subangdaku gawas lang sa Presinto 5 sa barangay Opao nga giplanohan nga mabalhin. Matud ni Paller nga nagplano ang mayor sa pagpalit og luna nga kabalhinan sa Presinto 5 tungod kay kasamtangan kini nga nahimutang sa sapa. Giplano usab nga mabalhin ang Presinto 6 sa barangay Canduman.

Una’ng gibalhin ang Presinto 1 sa karaang edepisyo sa nasunog nga merkado publiko nga nahimutang sa luyo’ng bahin sa National Shrine of Saint Joseph ngadto sa Senior Citizen’s Building sa Tribunal, barangay Centro nga duol usab sa Mandaue City Hospital. (Romeo T. Limpangog/GMR)(BANAT NEWS)