Munisipyo sa Medellin gilungkab

CEBU, Philippines - Usa ka lalaki nga giingong nilungkab sa munisipyo sa lungsod sa Medellin ang nadakpan sa kapolisan tungod sa  closed-circuit television camera diha sa Budget Office sa maong lungsod niadtong nakalabay nga gabii.

Ang dinakpan naila nga si Junrey “Jun” Bello, 26, taga Barangay Guiwanon, Medellin nga sakop sa Batang Cebu B.C 45 Gang, ang gang sa mga prisohan sa Sugbo ug dunay kaso kaniadtong robbery sa dakbayan sa Mandaue.

Ang nakasakop sa suspetsado sulod sa budget office mao si Dionesio Meca, 53. Matud pa ni Senior Police Officer 1 Ryan Castro ang desk officer sa Medellin Police nga nahinabi sa Banat News pasado alas-9 sa gabii padung manirado si Meca sa Municipal Hall apan nabantayan niini ang usa ka medalya nga naa sa pultahan ug sa iyang paglili sa sud nakita niya ang usa ka tawo.

Ila kining gigukod apan nakaikyas. Nadala unta sa suspetsado ang usa ka wrist watch, gold necklace, usa ka parisan sa earings ug salaping cash P500.

Sumala pa ni Castro nailhan ang suspetsado tungod sa gisuot niini nga pangbasketbol ug ang iyang tattoo hinungdan nga gi-adto nila sa balay ug gidakop. (Jojo C. Ugdol/EIM)(BANAT NEWS)