Shop sa LPG gilungkab
CEBU, Philippines - Mobalor og P180,000 ka mga cylinder valves ang nadala sa mga wala mailhing kawatan gikan sa usa ka Liquefied Petroleum Gas cylinder repair and maintencance company sa Barangay Magay, Compostela.
Ang nahanaw mao ang 1,200 ka mga gas cylinder valves gikan sa ASEPHIL Manufacturing Corporation human nakasulod ang mga kawatan pinaagi sa pagbangag sa bungbong sa ilang edipisyo.
Si Senior Police Officer 2 Pedro Enriquez sa Compostela Police Station nagkanayon nga gibangagan sa mga kawatan ang bungbong sa building gikan sa gawas gamit ang wala pa mahibaw-ing kahimanan aron makasulod.
Aduna untay duha ka mga security guards ang nag-duty anang gabhiona, ang usa naa nadestino sa guardhouse sa gate samtang ang usa sa sulod sa building apan walay nakabantay kanila.
Buntag na sa adlaw nga Huwebes nadiskubrehan ang maong bangag samtang nag-inspeksyon ang manager nga si Maria Norina Sarukam.
Wala’y closed circuit television (CCTV) camera sa mao nga kompanya apan padayon pa ang gihimo nga imbestigasyon sa Compostela Police Station. (Ma. Fatima R. Secuya/EIM)(BANAT NEWS)
- Latest
