Hepe, mga sakop ikiha

CEBU, Philippines - Daghang mga kaso ang matud pa posibleng ipasaka ni Mayor Johnny De Los Reyes batok sa kanhi hepe sa Talisay City Police Station nga si Superintendent Reycel Carmelo Dayon tungod sa pagpasaka sa mga polis og kasong arson batok kaniya.

Kasong fabricating of evidence, perjury ug damages (moral, actual ug exemplary) ang ipasaka sa mayor batok ni Dayon ug mga sakop nga maoy mipasaka og kaso kaniya.

Ang mayor gikasohan tungod sa pagkasunog sa gi-impound nga mini-dumptruck nga naa sa kostudiya sa kapolisan, butang nga gihimakak sa mayor. Si City Legal Officer Alfredo Sipalay miingon nga kining maong mga kaso maoy posibleng ilang isang-at batok sa maong polis.

Apan giklaro ni Sipalay nga dili siya maoy mangabogar sa mayor gumikan kay usa kini ka pribadong kaso ug way labot ang dakbayan.

Si Dayon ug upat ka mga sakop buot ipatangtang sa mayor tungod kay nawad-an na siya og pagsalig kanila.

Samtang si Talisay City Fire Marshall Senior Inspector Randy Mendaros nipahibalo nga sila lang ang adunay katungod paghimo og imbestigasyon tungod kay fire scene kadto, duna na silay gihimong linaing arson investigation sa maong kaso.  (BANAT NEWS)