Gihunghongang pahikugon

CEBU, Philippines - Human sa nahitabong paghikog sa duha ka tinun-an sa Daanbantayan National High School gikatahong dunay mga estudyante sa maong eskwelahan dunay madungog nga hunghong nga pasundon usab sila og hikog.

Ang Department of Education (DepEd) provincial division superintendent nga si Arden Monisit mibutyag sa Banat News nga mga huhongihong lang ang maong taho. Matud niya nga niadtong Miyerkules nagpadala siya og legal team ngadto sa lugar aron maoy mopahigayon sa imbestigasyon kabahin sa insidente.

Gibutyag ni Monisit nga si Mayor Augusto Corro mi-request og psychologist ug child specialist ngadto sa tunghaan aron maoy mo-eksamin sa mga bata.

Kagahapon ang mga estudyante sa Daanbantayan National High School gipaubos sa stress debriefing.

Si Bise Gobernador Agnes Magpale, chairman sa Provincial Children and Women’s Commission (PCWC) mibutyag nga atoa na ang hepe sa Provincial Social Welfare and Development (PSWD) nga si Rose Jao ug ang child specialist nga si Rose Gonato sa Daanbantayan.

Si Jao miingon dunay usa ka bata nga classmate sa duha nga naghikog nga ilang naka-estorya, mitug-an nga nakadungog siya og hunghong nga pahikugon kini, apan gituohang epekto lang kini sa trauma.

Giingon nga halos ang tanang tinun-an sa eskwelahan na-traumatized sa hitabo sa duha ka mga estudyante.

Niadtong Lunes ug Martes nagsunod paghikog ang manag-agaw nga 15-anyos tungod sa kahiubos ngadto sa ilang maestra nga wa mopirma sa ilang clearances.  (BANAT NEWS)