Apo ni Gaisano napaso sa eroplano

CEBU, Philippines - Napaso sa init tubig ang apo sa usa sa tag-iya sa mga tindahan sa Gaisano sa Sugbo samtang luwan sa Philippine Airlines gikan sa Bangkok padulong sa Manila niadto’ng Pebrero 22.

Kini human nangayo og tubig ang bata nga anak nila’ng Glenn ug Valerie Gaisano-Sebastian apan ang gihatag sa flight attendants init kaayo nga tubig hinungdan nga nayabo tungod sa kahadlok sa bata ug napaso ang paa ug bitiis.

Matud sa abogado sa pamilya, Atty. Baldomero Estenzo, nga wala atimana sa mga crew sa abyon ang bata hinungdan nga gidala sa St. Luke’s Medical Center sa Global City, Taguig ug nasuta nga nakaangkon og second degree thermal burn ang bata. Nangayo og pasaylo ang pangulo sa PAL nga si Jaime Bautista ug nitakda nga makigkita sa pamilya niadto’ng Marso 10 sa alas 7:30 hangtud alas 9:30 sa buntag butang nga gikasuko sa apohan sa bata nga si Eddie Gaisano.

Matud ni Estenzo nga kung tinud-anay ang pagpangayo og pasaylo sa PAL, dili sila ang magbuot sa oras.

Si Estenzo nibahad nga mosang-at og reklamo sa korte kung wala’y buhaton ang PAL sa mao’ng insidente. (BANAT NEWS)