Notadong tulisan nadakpan

CEBU, Philippines - Nasikop sa kapulisan sa Mambaling Police Station ang giilang notadong tulisan dihang misuway kini og tulis sa usa ka babaye diha sa dalan Tabada, Barangay Mambaling siyudad sa Sugbo niadtong Martes sa gabii.

Ang dinakpan giila nga si Sergio Ando Jr., 27, residente sa Sitio Villa Zacate, Barangay Basak Pardo samtang ang iyang gitulis mao si Nerisa Patalinghug molupyo sa maong dapit.

Matud ni Senior Police Officer 2 Rene Sebes, sa Mambaling Police Station gikan nangompra ang biktima ug padung na mouli dihang gisundan kini sa suspek ug gitionan og armas.

Human makuha ang kwarta sa biktima daling misakay ang suspek sa usa ka jeep pasaheroan ug nag-ilis og sinina aron dili mailhan, apan dunay nakakita sa gihimo sa suspek.

Usa ka motorist nga nagsakay og motorsiklo nga nagsunod sa jeep daling nangita og polis ug gisumbong ang iyang nakita.

Sila si PO1 Jefrey Ceba ug PO3 Lester Dajao dali nga miresponde sa hitabo hinungdan nga nasikop ra usab dayon ang suspek ug nakuhaan kini og usa ka .357 rebolber nga dunay tulo ka bala ug ang cellphone ug kwarta sa biktima.

Apan gihimakak sa suspek nga iyaha ang armas tungod kay gilabni lang niya ang pitaka sa biktima. (BANAT NEWS)