P700 mil shabu sakmit, tagbalay nadakpan

CEBU, Philippines – Daku’ng kantidad na sab sa gituohang shabu ang nasakmit sa mga sakop sa City Intelligence Branch sa Cebu City Police Office gikan sa usa ka balay nga gihimo’ng drug den sa sitio Granada, barangay Quiot alas 9 sa nakalabay nga gabii.

Ang dinakpan naila nga si Geyner Gonzalez, 36, alyas Jojo nga nagpuyo sa maong lugar ug tag-iya sa panimalay apan ang target sa kapolisan nga usa ka level 2 drug pusher nga si Teodoro Pepino, hingkod, alyas Odie, ang nakasibat.

Matud ni Insp. Gomersendo Mandawe, deputy chief sa CIB, nga ilang gidakop si Gonzalez sa kaso nga pag-atiman og drug den nga wala’y piyansiya nga girekomendar.

Atol sa buy-bust operation, nakapalit og gituohang shabu ang asset sa kapolisan sa kantidad nga P200 apan diha’ng paingon na unta sa pagronda ang taga CIB nakabantay si Pepino ug nakalayat agi sa likod nga bintana sa iyang giabangan nga lawak sa balay ni Gonzalez. Sulod sa gipuy-an ni Pepino nakuha sa kapolisan ang usa ka medium, usa ka daku nga bulto ug 334 ka gagmay nga pakete sa gituohang shabu nga mokantidad og P700,000.

Nakuha sab ang P510 cash nga gituohang halin sa ilegal nga kalihukan ug usa ka timbangan sa shabu. Si Mandawe niingon nga apil gyud sa kaso si Gonzalez kay sa ilang nasayran duna kini’y porsiyento matag dunay mosuyop sa balay.

Sa pagpakighinabi sa Banat News ni Gonzalez kini niangkon nga nahibawo sa ilegal nga negosyo ni Pepino apan wala nipatuo diha’ng iya’ng gibadlong. Matud ni Gonzalez nga halos lima ka buwan pa lang nga nag-abang sa lawak sa ubos sa iyang balay si Pepino sa tag P2,500 ang buwan. Kasamtangan nga gitanggong sa karsel sa CCPO detention cell ang dinakpan samtang padayun nga gipangita si Pepino. – /GMR) (BANAT NEWS)