Tulisan nag-masturbate

CEBU, Philippines – Nagduwa sa kinatawo ang tulisan atubangan sa babaye’ng biktima sa pagpanulis sa iya’ng tindahan sa barangay Tabok, dakbayan sa Mandaue pasado alas 11 sa buntag kagahapon.

Si Police Officer 1 Peter Martinez sa Presinto 3 sa Mandaue City Police Office (MCPO) niingon nga nipahunong sa giluwanan nga itom nga motorsiklo ang wala hiilhi’ng lalaki ug niduol sa tindahan sa biktima ug nag-apload sa cellphone.

Matud ni Martinez nga samtang nag-apload, nakigsulti pa ang biktima pinaagi sa pagsukitsukit sa dagan sa pagpaninda sa iyang tindahan.

Human sa pipila ka gutlo, nakamatikud ang lalaki nga abli ang pultahan sa tindahan hinungdan nga kalit siya nga nisulod ug gikandaduhan dungan ang pagpahibawo’ng tulis.

Ang katabang nga babaye ug tulo ka gagmay pa nga anak sa 36-anyos nga biktima ang gimanduan sa tulisan sa pagsulod sa ilang pansayan ug gikandaduhan.

Pagkahuman gipangayo ang bag nga gisudlan sa kuwarta nga wala matino ang kantidad lakip na sa tablet ug mga cellphones.

Human makuha ang kuwarta ug mga butang, gimandoan ang biktima sa pagsulod sa ilang kuwarto kay buot pa mopahimulos sa kaanyag.

Diha’ng didto sa sulod sa ilang lawak mao’y gihimo sa tulisan ang pagpanghikap sa hubo nga lawas sa biktima ug nag-masturbate hangtud nga nagawsan sulod lang sa usa ka minuto nga gidugayon.

Nagdali paggawas sa panimalay ang tulisan ug nipabulhot sa pagpadagan sa motorsiklo.

Samtang nadagit ang kinolekta nga salapi ug mga cellphones sa duha ka lending collectors nga gitulis sa barangay Umapad sa maong dakbayan pasado alas 12 sa udto sa niagi’ng adlaw. Ang biktima mao sila si Romeo Japson Jr. ug Jordan Glimada, mga hingkod ug collector sa EL-J Lending sa Juana Subdivision sa Banawa, dakbayan sa Sugbo.

Si Senior Police Officer 2 Juan Calamba sa Presinto 5 sa Mandaue City Police Office (MCPO) niingon nga nangolekta ang biktima sa ila’ng mga kustomer diha’ng ilang nasugatan ang duha ka wala hiilhi’ng lalaki nga sakay sa Honda XRM nga motorsiklo nga kolor pula.

Matud ni Calamba nga giduol ang mga biktima sa lalaki nga nag-angkas sa motorsiklo dungan ang pagtion kanila og armas ug nideklarar og tulis dayun pangayo sa ilang kinolekta nga P5,700 ug gipanguha usab ang ilang mga cellphones.

Nagdali pagsibat ang mga tulisan padulong sa Pajara Park ubos sa Marcelo B. Fernan Bridge.

Si Calamba niingon nga dali unta sila sa nakatubag sa alarma pinaagi sa paggukod sa mga tulisan apan wala na igkita sa maong dapit. – /GMR) (BANAT NEWS)