‘Kawatan’ naabtan sa tagbalay
CEBU, Philippines – Usa ka lalaki ang nadakpan sa mga residente sa Genes Compound, Sabellano St., Barangay Quiot ning dakbayan sa Sugbo human nasakpan sa usa ka Chinese national nga misulod sa balay niini ug mokuha unta sa mga mahalong mga relo nga mokantidad og P2.7 milyones.
Ang reklamante naila nga si Zili Lin, 33, lima na ka tuig nga nagpuyo sa maong lugar, samtang ang suspetsado naila nga si Scutt Antonio Pilapil Nelson, 23, usa ka Filipino-American nga taga Sitio Bogo sa maong barangay.
Matud pa ni Police Officer 1 Keth Vincent Gabica ang desk officer sa Punta Princesa Police Station nga nahinabi sa Banat News naabtan sa biktima ang suspek diha sa iyang kwarto hinungdan nga nagharong ang duha.
Sumala pa nga gikuha sa suspetsado ang jewelry box ug gipuspos kini ngadto sa biktima ug gibunalan og dos-por-dos nga kahoy ang biktima kinsa naputos og bun-og sa iyang mga bukton tungod sa pagsige og panagang.
Ang asawa sa biktima nga usa ‘sab ka Chinese ang dali nga nangayo og tabang sa mga silingan hinungdan nga nasikop ang suspetsado ug gihatod sa buhatan sa kapulisan.
Sigun pa ni Gabica nga mibisita sa ilang buhatan ang inahan sa suspetsado ug kini miingon nga dili kawatan ang iyang anak apan kini miangkon nga mosaka og balay ang iyang anak bisan dili ilaha ug angkonon nga ilaha kining balay.
Narekober gikan sa suspetsado ang mga mahalong relo ug mga gadgets nga mikantidad tanan og P2, 799, 000.
Kagahapong adlawa gipaubos na sa inquest proceedings ang suspetsado nga gikatakdang pasakaan og kaso’ng robbery ug frustrated homicide sa kapolisan. – /EIM) (BANAT NEWS)
- Latest
