Suporta sa adbokasiya sa Brown Rice
CEBU, Philippines – Gitinguha karon sa Konseho sa Dakbayan sa Mandaue nga ang tanang kan-anan sa dakbayan mo-serve usab sa mas sustansiyadong “brown rice”.
Si Konsehal Jimmy Lumapas, chairman sa committee on market and agriculture milapabang og resolusyon alang niini sa tinguha nga makatabang sa mga programa sa gobiyerno aron momenus ang importasyon niini og imported rice.
Sumala pa ni Lumapas, base sa mga pagtuon, ang brown rice mas daghan og makuhang sustansya, mineral ug bitamina itandi sa naandang puti nga bugas o mga well-milled rice.
Ang panawagan ni Lumapas gibase sa Section 15 sa Article 2 ubos sa 1987 Philippine Constitution nga katungod sa mga Filipino nga makabaton og maayong panglawas.
Ug pinaagi sa pag-anad sa mga tawo pagkaon og “brown rice” mapahaom kini sa self-sufficiency program sa nasudnong kagamhanan.
Sa website sa Philippine Rural Reconstruction Movement, ang aktibista ug organic agriculture advocate nga si Ka Jimmy Tadeo miingon nga dako kaayo og matabang sa gobiyerno ang pagkaon og brown rice, kini tungod kay base sa pagtuon, mas bug-at sa tiyan o dali kining makabusog itandi sa puti nga bugas humay, nagpasabot nga bisan gamay lang ang makaon, makabusog na kini.
Usa sa mga speaker sa Policy Seminar-Workshop on Mainstreaming Brown Rice to Low- and Middle-Income Families nga gihimo niadtong 2011, si Dr. Marissa V. Romero, Supervising Science Research Specialist from PhilRice mipadayag nga “nutritionally superior” itandi sa well-milled o polished rice kun sa protein, fat, dietary fiber, B vitamins, vitamin E, minerals ug anti-oxidants ang hisgutan.
Bisan limitado lang ang suplay sa maong bugas, apan nasuta sa pagtuon sa mga tawong naanad og kaon niini nga makapaubos kini sa cholesterol level, makapugong sa pagturok sa tumor ug makapugong sa diabetes. – /EIM) (BANAT NEWS)
- Latest
