Daghan nang mireklamo vs taxi drivers
CEBU, Philippines - Miabot na og walo ka drayber sa taxi ang gireklamo sa ilang mga pasahero diha sa Land Transportation Franchising and Regulatory Board (LTFRB) tungod sa pagdumili paghatag og P10 nga rollback sa flagdown rate.
Si Atty. Edwin Antipuesto, hearing officer sa LTFRB-7 regional office, miingon nga tagsa-tagsaon nila pagpatawag ang mga hingtungdang drayber apil ang ilang operators aron patubagon sa reklamo.
Nakasabot si Antipuesto nga human masabwag pag-ayo ang impormasyon kabahin sa reklamo batok sa taxi drayber nga si Joel Ramos nga gipasanginlang mition pa og kutsilyo sa iyang pasahero kay nasuko nga gipangayoan g’yud sa P10 nga rollback, daghan na ang nangisog sa pagreklamo.
Apil sa gireklamo mao ang drayber sa Reymark Taxi nga matud sa pasahero nga si Jane Ariquit arogante kaayo ug wala g’yud mohatag og rollback nga P10.
Laing taxi (Caraga body No. 281) gireklamo ‘sab sa usa ka Liezel Amadeo. Ang report sa DYLA nagkanayon nga ang drayber sa taxi (GXF 824) gireklamo usab ni Jay Gil.
Ang drayber sa Corominas taxi Body No. 5562 gireklamo usab ni Chona dela Pena samtang ang nagmaneho sa DND taxi nga Body No. 5284 gisumbong usab nga arogante ug wala gihapon mohatag og rollback nga P10.
Apil sa gireklamo mao ang usa ka DND taxi nga Body 5284 ug ang laing taxi nga ang plate number GXL 684 nga ang mireklamo mao ang usa ka “LA Dionaldo.”
Matud ni Antipuesto nga itakda nila ang husay niini’ng mao nga mga reklamo karong sunod semana. (Rene U. Borromeo)(BANAT NEWS)
- Latest
