Ikaduha’ng jo nadakpan
CEBU, Philippines - Laing job order (JO) nga kawani sa Lapu-Lapu City Hall ang nakuhaan og 11 ka gagmay’ng pakete ug usa ka daku nga putos sa shabu sa sitio Kinalumsan, barangay Canjulao niadto’ng Miyerkules sa gabii.
Si Senior Inspector Verniño Noserale, hepe sa City Intelligence Branch ug City Anti-Illegal Drugs Special Operations Task Group sa Lapu-Lapu City Police Office, niila sa suspek nga si Wilyfredo Castillas, 53, nadestino sa Clean and Green.
Gawas sa drugas, na-recover sa kapolisan ang P200 nga marked money, halin nga moabot og P300, mga drug paraphernalia ug usa ka mobile phone.
Si Castillas mao ang ikaduha’ng JO sa Lapu-Lapu City Hall nga nasikop sa buy-bust operation. Si Mayor Paz Radaza niingon nga dali’ng matangtang sa serbisyo ang mga job order kung malambigit sa ilegal nga drugas.
Natanggong na si Castillas sa Lapu-Lapu City detention cell ug pasakaan og kaso. (BANAT NEWS)
- Latest
