Mga polis patabangon sa trapik

CEBU, Philippines - Patabangon sa pagpahapsay sa dagan sa trapiko sa dakbayan sa Mandaue ang mga polis nga sakop sa Public Safety Company.

Kini ang isugyot ni Mayor Jonas Cortes ngadto kang Senior Superintendent Petronelli Baldebrin, ang direktor sa Mandaue City Police Office (MCPO).

Nakahunahuna si Cortes sa mao’ng lakang tungod sa nasinati karon nga huot sa dagan sa trapiko sa dakbayan nga nagkinahanglan nga matabangan usab ang mga traffic enforcers.

Matud ni Cortes nga tungod sa daghan kaayo nga mga dalan sa dakbayan nga nagkinahanglan og mga traffic enforcers mao’y hinungdan nga may mga higayun nga ang pipila ka lugar dili maatiman.

Ang MCPO kasamtangan karon nga mihingusog sa ila’ng pagpatuman sa police visibility pinaagi sa pagdestino sa mga polis nga sakop sa City Public Safety Company. (BANAT NEWS)