‘Wa ko manion’
CEBU, Philippines - Drayber sa taksi nga gireklamong nanuyo ug nanion og kutsilyo sa magtiayong pasahero nga miinsister sa P30 fare reduction, mihimakak sa pasangil batok kaniya.
“Di na tinuod nga gitionan nako siya og kutsilyo. Wa na nahitabo,” insister pa ni Joel Ramos, drayber sa SD Taxi, dihang kini ug ang reklamante nga si David Horca nag-atubang sa hearing sa Land Transportation Franchising and Regulatory Board-7.
Si Horca mipasaka og reklamo diha sa LTFRB-7 tungod sa wala paghatag ni Ramos sa P10 nga fare discount ug gihadlok hinuon silang panunggabon, nahitabo kini niadtong Lunes sa adlaw nga gipatuman ang kamandoan.
"Wa ko nanion niya. Nasuko na siya nganong wa pa ma-calibrate akong taxi nga niubos na man ang pletihan. Akoa siyang giingnan nga wa pa na ma-calibrate tungod sa kadaghan sa mga taxi,” matud pa ni Ramos.
“Naa man g’yud nay CCTV ang I.T. Park, ipatan-aw nila og naa ba ko’y dala nga kutsilyo. Ako pa man gani ang nagsulti niya nga kung naa kay reklamo, adto reklamo sa LTFRB,” dugang pa niya.
Matud pa ni Ramos iyahang konsultahon ang iyang taxi operator kun mopasaka sila og kaso batok ni Horca tungod sa pagpakauwaw kaniya diha sa Facebook ug sa gihulagway niyang paghulga kaniya nga paputlan og ulo.
Si Horca nagbutang sa iyang Facebook account og: “Mga ing aning tawo ang dapat pugutan og ulo sa ISIS!"
Si Horca namasangil ni Ramos diha sa Facebook account nga kauban silang duha sa iyang asawa nga sakay sa maong taksi.
Si LTFRB-7 regional director Rey Elnar miingon nga karong gihimakak kini ni Ramos, ang duha iyang giawhag nga magdala og ilang mga testigos sa sunod nga hearing, hinuon wa pay petsa kun kanus-a kini himuon.
Giduso na ni Elnar ang ilang resolusyon bahin sa maong reklamo diha sa Land Transportation-7 aron pagtino kun dunay silot nga ipahamtang kang Ramos. (BANAT NEWS)
- Latest
