Sakit sa ting-init pabantayan

CEBU, Philippines - Gipahimangnoan sa Department of Health ang publiko batok sa nagkalainlaing sakit nga motakboy panahon sa ting-init nga nasinati na sa pagkakaron. Matud ni Dr. Jeanette Pauline Cortes, pangulo sa Non-Communicable Disease Section sa DOH-7, nga panahon sa ting-init dili gyud mawala ang ubo ug sip-on kon ang gitawag nga upper respiratory infection.

Aron malikayan ang maong mga sakit, ang maayo’ng buhaton mao ang pagtabon sa baba kun moubo ug kanunayon ang pag-inom og tubig ug dili usab kalimtan ang pagtumar og vitamins aron lig-on ang resistensiya ug dili mataptan og sakit

Lakip sa gipahimangno ang mga sakit nga makuha sa mga pagkaon nga sagad ipamaligya panahon sa ting-init sama sa buko juice, gulaman ug uban pa’ng klase sa pagkaon nga pangpabugnaw.

Ang pangulo sa Regional Epidemiology and Surveillance Unit sa DOH-7, Rennan Cimafranca, nipahimangno sa katawhan nga dili magpataka og palit og mga pagkaon daplin sa dalan.

Matud ni Cimafranca nga dili angay mokompiyansa tungod kay wala’y nakakita kun giunsa pagluto ang pagkaon lakip na usab ang tubig ug ang sagol nga gigamit ilabi na kasagaran sa mga naninda sa dalan wala’y health and sanitary certificates. (BANAT NEWS)