Operator, drayber ipatawag karon sa LTFRB
CEBU, Philippines - Karong adlawa magtagbo sa buhatan sa Land Transportation Franchising and Regulatory Board (LTFRB-7) ang operator sa taxi driver nga giingong nanion og kutsilyo sa iyang pasahero nga mireklamo nganong wala kini motuman sa fare reduction sa taksi.
Nahitabo ang giingong pagpanion gabii niadtong adlaw'ng Lunes nga mao ang unang adlaw sa pagpatuman sa P30 nga flagdown rate.
Nadapit ang atensiyon sa katawhan dihang ang reklamante nga si Dave Say Horca mi-post sa Facebook account labot sa gihimo sa taxi driver nga si Jose Ramos.
Ang magtiayon gikan sa Escario ug nagpahatod sa IT Park sakay sa SD taxi nga gimaneho ni Ramos.
Sa iyang Facebook account didto gisaysay ni Horca ang gihimo sa driver nga giingong nasuko kini dihang ilang gipangayuan sa P10 nga refund tungod kay nius-os na man ang flagdown rate.
Matud pa nga nasuko ang driver ug gilabay kanila ang duha ka P5 nga sensilyo ug pagkahuman mikuha og kutsilyo hinungdan nga nanagan silang duha sa iyang asawa.
Ang LTFRB mipadala og summon sa operator ug sa maong drayber. Kun makita nga sad-an ang driver pamultahon ang operator og P5 mil samtang P1,000 ang iyang driver.
Matud sa OIC Regional Director sa LTFRB-7 Reynaldo Elnar nga labing una kini nga insidente ug angay nga disiplinahon ang abusadong mga drayber. (BANAT NEWS)
- Latest
