Kaalyado Garcia gitas-an ra sa unom ka buwan

CEBU, Philippines - Taas ra ang unom ka buwan nga suspensiyon nga gipahamtang kang Dumanjug Mayor Nelson Garcia sumala pa ni Board Member Alex Binghay.

Kini maoy pagtan-aw ni Binghay sa desisyon sa committee on complaints and investigation sa Hunta Probinsiyal kabahin sa kasong grave misconduct ug grave abuse of authority nga gipasaka ni Bise Mayor Efren Gica.

Matud ni Binghay nga samtang han-ay ug “makiangayon” ang paghatag sa silot, taas ra kaayo ang unom ka buwan nga way sweldo mao nga iyang gisugyot nga paubsan kini ngadto lang sa tulo ka buwan.

Hinuon matud ni Binghay magdepende kini gihapon sa desisyon sa komitiba.

Si Binghay kinsa kaalyado ni Garcia sa partido nagkanayon nga nahimo usab siya’ng mayor kaniadto ug nakahibawo usab siya kabahin sa balaod.

Niadtong Septiyembre 16, 2013 gipasaka ni Gica ang maong reklamo tungod sa matud pa pag-insister ni Garcia pagpili kang Emmylou Cabonillas isip Sangguniang Bayan (SB) Secretary.

Sa iyang bahin, si Garcia miangkon kini sa pagtudlo kang Cabonillas isip SB Secretary apan gihimakak niya ang pasangil nga gimandoan niya kini nga di i-turnover ang yawe sa buhatan sa SB Secretary. (BANAT NEWS)