3 ‘scalawags’ mihimakak

CEBU, Philippines - Tulo sa siyam ka mga polis nga nadestino dinhi sa dakbayan sa Sugbo nga gidudahang nalambigit sa ilegal nga kalihokan ang kusganong mihimakak sa maong pasangil.

Kini ang gitug-an ni Konsehal Dave Tumulak nga miingon nga iyang naestorya ang maong mga polis, apan usa ka polis ang wala mitingog.

Si Tumulak miingon nga miangkon ang maong mga polis nga sila nalambigit sa maong pasangil kaniadto apan kuno sila nagbag-o na karon ug wala na nalambigit sa mga ilegal nga binuhatan.

“Naa sa’y uban mahibulong nga giduldulan sila og kuwarta samtang padung sila gawas. Naa’y mogukod nila motunol unya moingon “pang-snack ninyo sir” pero wa sila kahibawo kinsay nihatag. Isulod man sa bulsa unya modagan na dayon ang nihatag,” pasabot pa sa konsehal.

Gitambagan hinuon ni Tumulak ang maong mga polis nga dili magsige og duaw sa balay sa mga drug personalities ug bisan mangaon sa gawas sa balay sa mga gidudahang nalambigit sa drugas aron di sila dudahan.

Ang hepe sa Regional Intelligence Branch-7 , Senior Superintendent Pablo Labra II miingon nga dili niya gustong ilabay sa laing lugar ang maong mga polis  sama sa baruganan ni Mayor Michael Rama.

“The mayor is right but ingon ana man gud nga klase sa problema nagkinahanglan na og ebidensya , duna’y proseso ana,” pasabot pa ni  Labra.

Si Labra miingon nga mas maayo kun dunay mopasaka og reklamo kay bisan kombinsido sila nga nagbinuang kining mga polisa base sa ilang gihimong imbestigasyon kinahanglan duna g’yuy ebidensya.

Matud pa ni Labra nga sagad sa mga kaso batok sa mga polis nabasura tungod kay way ebidensya. (BANAT NEWS)