Taphaw nga rason sa pagpatay

CEBU, Philippines – Pipila sa mga nahitalang krimen nga pagpatay tibuok kalibutan ang subo palandungon naggumikan sa taphaw kaayong hinungdan. Sama pananglit ning nahitabo didto sa Moscow, Russia diin usa ka 13-anyos nga bata ang mikutlo sa kinabuhi sa iyang maguwang babaye gumikan lamang sa remote control.

Ang mga kapulisan didto sa kasadpang bahin sa Siberia nagkanayon nga ang maong bata mipusil sa nawong sa 17-anyos niyang maguwang ginamit ang hunting rifle human sa mainiton nilang panaglalis gumikan sa kun kinsa kanila ang dunay katungod magkupot sa remote control sa ilang telebisyon.

Nahitabo ang maong insidente didto sa Omsk region village sa Zhukovka. Ang patay’ng lawas sa biktima nadiskubrehan sa ilang inahan human kini mipauli sa ilang balay gikan sa trabaho. Ang nakaapan kay dili mapasakaan og kaso ang suspetsado kay menor de edad man kini.

Didto sa Chicago, USA, usa ka 39-anyos nga lalaki ang gisentensiyahan nga mapriso sud sa 40 ka tuig gumikan sa linoog nga pagpatay niini sa iyang inahan gumikan lamang sa pagdumili niini pagpalit kaniya og ticket alang sa konsiyerto ni Avril Lavigne.

Basi sa mga dokumento nga nahipos sa korte, nasuko og maayo si Robert Lyons  sa dihang gibalibaran kini sa iyang hangyo nga palitan og ticket alang sa maong concert.

Taliwala sa mainiton nilang panaglalis, kalit lang nga giatake ni Lyons ang 61-anyos niyang inahan nga si Linda Bolek pinaagi sa pagbunal sa ulo niini duha ka higayon ginamit ang botelya sa bino.

Human niini, mikuha pa siya og kutsilyo dayong hansak siyam ka higayon sa likod sa nalup-og niyang inahan. Wa pa g’yud matagbaw, iyang gibuboan ang lawas sa iyang inahan og nagkadaiyang matang sa kemikal. Dali siya nga misibat human sa bangis niyang krimen apan pipila ka oras nasikop ra dayon siya sa mga kapulisan sud sa usa ka kan-anan. (gikan sa www.upi.com/EIM) (BANAT NEWS)