Fastcraft nabangga

CEBU, Philippines – Moabot sa 19 ka mga pasahero ug duha ka tripulante sa 2Go Express Incorporated nga nag-operate sa Supercat fastcrafts ang gidala sa tambalanan human nakaangkon og mga bun-og sa lawas sa dihang mibangga sa pantalan ang gisakyan nilang SuperCat St. Seathiel kagahapon sa alas 8:25 sa buntag.

Matud pa sa impormasyon nga gipaabot ni Philippine Coast Guard Commander Rudolfo Villajuan nga ang maong fastcraft gikan sa dakbayan sa Tagbilaran nga duna’y sakay nga 119 ka mga pasahero.

Apan sa dihang paingon na unta kini nga modunggo sa Pier 1 kalit lang nagkaproblema sa “steering system” niini hinungdan nga kini mibangga sa pantalan. Tungod niini napiyapi og maayo ang atubangan sa maong fastcraft.

Kini sab ang gikompirma ni Luz Torevillas ang passage manager sa SuperCat nga mibasa sa pamahayag sa kompanya sa maong hitabo. Matud niya nagkaproblema ug duna’y nasugatan nga “maneuvering control failure” ang maong sakyanan hinungdan kini nabangga.

Apan gipasabot ni Torevillas nga ang pamunoan sa 2GO andam moabaga sa tanan nga galastuhan sa mga pasahero nga nadala sa Chung Hua Hospital.

Si Lyndon Landoy ang AVP Ship Management sa maong kompanya mipasabot nga usa lang ka “isolated case” ang maong hitabo.

Usa sa mga pasahero sa maong fast craft nga si Consesa Belen, 56, nga taga Tagbilaran ang nakaangkon og bukol sa ulo human nadasok sa kilid sa iyang gilingkoran atol sa pagkabangga sa fastcraft sa pantalan.

Kuyog ni Belen ang iyang anak nga duna untay atimanon nga mga papeles sa Professional Regulation Commission (PRC) dinhi sa Sugbo.

“Pag minor niya misulod adtong piot nga dapit nabangga man siya mao ‘to, hubag kaayo ni siya (gitudlo ang kilid sa iyang ulo) maayo na lang nakadali og palit akong anak og ice,” matud pa ni Belen. Matud pa niya dunay ubang pasahero nga nalukapa sa salog kay ang uban nagtindog na’ng daan ug nangandam nga makauna og kanaog.

Hinoon si Belen miingon nga sila giatiman ra sab sa mga sakop sa 2GO hangtod na sa ilang pagpatambal.

Diha usab dayon si Konsehal Dave Tumulak kinsa mibutyag nga ang ubang mga pasahero namarog nang daan hinungdan nga nangalamba sila atol sa pagbangga. Ang Maritime Industry Authority -7 pinaagi ni Atty. Jose Cabatingan mihimo gilayon og imbestigasyon ug magpaabot sa marine protest ni Captain Norman Teves, sa pagkakaron gisuspenso una ang biyahe sa fastcraft.

Ang naa pa sa usa ka pribadong tambalanan sa pagkakaron mao silang Maria Trinidad Arafol, 54, Voltaire Godinez, 45, Remolador Silvano,56, ug Massimo Montisano, 42. – /EIM) (BANAT NEWS)