Mipatay human gi-unfriend ang anak sa Facebook
CEBU, Philippines – Pipila seguro kanato nakasuway na nga gi-'unfriend' kita diha sa Facebook. Usa sa mga rason nga wala kita makauyon sa batasan niadto’ng atong gi-unfriend o ato ba nga gikabangi sa mga isyu mao nga gipapha nato sa talaan sa atong FB friends. Mao kini ang gibuhat sa live-in partner nga sila’ng Billy Payne, Jr., 36 anyos, ug Billie Jean Hayworth, 23 anyos, apan wala damha nga mosangpot diay kadto sa usa ka dugoon nga krimen nga nakatapos sa ilang kinabuhi.
Didto kini nahitabo sa Tennessee diha’ng gi-unfriend nila’ng Payne ug Hayworth si Jenelle Potter, 30 anyos, sa ilang FB page. Nasagmuyo si Jenelle sa gibuhat kaniya, apan mas gibati og grabe’ng kalagot ang 60-anyos niya’ng amahan nga si Marvin "Buddy" Potter.
Sangko sa langit ang kapungot ni Marvin diha’ng iyang nasayran ang gibuhat sa magtiayon ngadto sa iyang anak. Si Marvin ug si Jamie Lynn Curd, nga may romantiko’ng pagbati kang Jenelle, naghuramentado ug gipatay sila’ng Payne ug Hayworth. Maayo na lang gani kay wala nila pasakiti ang walo pa ka bulan nga anak sa magtiayon nga niadto’ng tungora anaa sa mga kamot ni Hayworth.
Ang magtiayon pulos gipangpusil su’d sa ilang panimalay. Pipila ka semana sa wala pa mahitabo ang krimen, sila si Potter ug Payne nagkalalis na diay. Sila si Payne ug Hayworth mireklamo sa kapolisan kay gi-harass sila ni Jenelle pinaagi sa telepono ug sa Internet nga maoy hinungdan nga ila kining gi-unfriend sa FB. (gikan sa www.oddee.com) (BANAT NEWS)
- Latest
