2 taga Liloan biktima sa Salisi

CEBU, Philippines – Nabiktima sa gituohang mga sakop sa Salisi Gang ang usa ka negosyante ug laing usa nga pulos taga lungsod sa Liloan sa niagi’ng adlaw.

Usa ka Ermitisa Erasmo, 43, minyo nga taga sitio Tuburan, Jubay, lungsod sa Liloan ug tag-iya sa Dublin Trading sa North Road, Basak, dakbayan sa Mandaue nawagtangan og daku’ng kantidad sa salapi ug mahalong mga butang alas 2 pasado ang takna sa hapon.

Si Senior Police Officer 1 Gregorio Cabizares sa Presinto 3 sa Mandaue City Police Office (MCPO) niingon nga gi-parking sa biktima ang iyang Honda CRV ug gibiyaan diha’ng iya’ng gitawag ang iya’ng kawani alang sa pag-alsa sa television set.

Apan pagbalik sa iya’ng sakyanan maoy iya’ng namatikdan nga nahanaw na ang iya’ng bag nga gisudlan sa iPhone nga P35 mil, P10 mil nga salapi ug uban pa. Laing biktima sa Salisi Gang mao si Chris Evert Rulfolo, 28, minyo nga taga Villa Lorena, San Vicente, Liloan.

Si Police Officer 3 Julius Tradio sa Presinto 4 sa Mandaue City Police Office (MCPO) niingon nga kuyog sa biktima ang iyang pamilya nga nanihapon sa de kalidad nga kan-anan sa dalan A.S. Fortuna sa barangay Banilad sa maong dakbayan alas 6 pasado ang takna sa niagi’ng gabii.

Dugang ni Tradio nga gibutang sa biktima ang iyang shoulder bag sa lingkuranan ug natingala na lang nga kalit kini’ng nahanaw uban sa salapi nga P6,000, cellphone, plane ticket ug uban pa nga sulod niini. Si Tradio niingon nga nakuha sa close circuit television (CCTV) camera ang wala hiilhi’ng lalaki nga nagsul-ob og green nga T-shirt nga naglakawlakaw sa maong dapit dayun kuha sa mga butang sa biktima ug nigawas gikan sa kan-anan. – /GMR) (BANAT NEWS)