Kalit kaayo ang hitabo–SPO2 Bequilla

CEBU, Philippines – Mga polis nga gikaengkwentro sa mga batan-ong gidudahang miyembro sa criminal gang sa Inayawan ning dakbayan sa Sugbo mibutyag nga nakalitan sila sa nahitabo hinungdan nga dunay nangasamdan kanila.

Sa pakighinabi sa Banat News naangol nga si Senior Police Officer 2 Julieto Bequilla, nagkanayon paspas ug kalit kaayo ang panghitabo.

Si Bequilla miingon nga atol sa ginukuray nga naabot sa usa ka gamay nga eskina nakaplastar nang daan ang duha ka batan-on nga kauban sa batan-ong ilang gigukod nga si Alyas Atong.

Matud pa ni Bequilla ambush ang nahitabo tungod kay sa pagsulod nila sa dapit gipaulanan dayon sila og bala.

Apan nakahigayon pa ang duha ka polis sa pagbalos hinungdan nga dali sab nga misibat ang duha ka batan-on. Si Bequilla miingon nga iya dayong gitawgan ug gipahibalo ang iyang asawa nga usa usab ka polis nga nadestino sa Camotes.

Nasamdan usab sa maong hitabo sila si Police Officer 1 Philip James Tanza ug ang usa ka civilian asset, samtang si alyas Atong kritikal ang kahimtang dihang nalandig sa tambalanan.

Kung tugotan na sa doktor si Bequilla nga makagawas, matud niya mobalik gihapon siya sa naandan niyang trabaho. Sa 14 ka tuig na niya sa serbisyo karon pa siya naangol sa mga operasyon nga ilang gihimo.

Ang officer in-charge sa Cebu City Police Office, Sr. Supt. Conrad Capa subling mipahimangno sa iyang mga sakop nga dili g’yud mokompiyansa matag dunay operasyon.

Hinuon gipasabot ni Capa nga bisan pa man og duna’y naangol nga mga polis kini wala nagpasabot nga mohunong sila paghimo sa ilang trabaho. – /EIM) (BANAT NEWS)