Polis vs gang

CEBU, Philippines- Duha ka operatiba sa City Intelligence Branch ug ang usa ka civilian agent sa Cebu City Police Office ug kritikal ang lalaki nga nakigpinusilay kanila niadtong Sabado sa hapon diha sa White Road sa Inayawan ning dakbayan sa Sugbo.

Ang naangol mao sila si Senior Police Officer 2 Julieto Bequilla, PO2 Phillip James Tanza, ug ang agent nga si Crisanto Arante.

Samtang kritikal ang usa ka lalaki nga nailhan lang sa ngalan nga “Atong” nga anaa karon sa usa ka pribadong tambalanan. Si Superintendent Romeo Santander, hepe sa CIB, miingon nga human sa direktiba ni Senior Supt. Conrad Capa, officer-in-charge sa Cebu City Police Office nga sulbaron ang kutay sa mga pagpamusil sa Inayawan.

Tungod niini nagpahigayon sila kagahapon og follow-up operation ug ilang nakit-an si Atong nga nagmotor nga kadudahan ang lihok hinungdan nga ilaha kining gisita.

Apan gikatahong kalit kining namusil kanila ug duna pay laing miapil og pamusil sa mga polis. Ang mga nasamdang polis gidala sa tambalanan lakip na si Atong nga napusilan sa mga polis.

Sumala pa ni Santander nga si Atong nalambigit sa pipila ka mga pagpamatay sa Inayawan.

Sa miaging buwan, upat ka tawo ang gipusil patay sa maong barangay ug gikan sa Enero 2014 hangtud sa bulan sa Pebrero ning tuiga miabot og 34 ka kaso ang pagpamusil sa maong dapit.

Matud pa ni Santander, duna pay  tulo hangtod upat ka mga batan-on sila nga  gipangita nga apil sa namusil sa mga polis.

Gidugang ni Santander nga si alyas Atong  maoy usa sa mga ‘tirador’ sa maong dapit. Giisip nga “armed and dangerous” ang ilang gang. Sa pagkighinabi sa Banat News sa naangol nga si SPO2 Bequilla mibutyag kini nga paspas ug kalit kaayo ang panghitabo. (BANAT NEWS)