Drug suspek napusilan
CEBU, Philippines - Usa ka gipasanginlang drug pusher ang nasamdan human misuway og ikyas atol sa gipahigayon nga buy-bust operation sa miaging Biyernes sa gabii sa New Sangi Road, Barangay Pajo dakbayan sa Lapu-Lapu.
Matud ni Senior Inspector Verniño Noserale, hepe sa City Anti-Illegal Drug Special Operations Task Group ug sa City Intelligence Branch sa Lapu-Lapu City Police Office, nadakpan ang target sa operasyon nga si Richard Degolacion, 37.
Sumala pa nga nabantayan ni Degolacion nga polis ang nipalit kaniya og drugas ug kalit kini nga midagan ug mikatkat sa atop sa iyang balay ug miambak sa sementadong koral sa usa ka gamay’ng motel sa nahisgutang dapit.
Dugang ni Noserale, kalit nga nagpabuto ang suspetsado ngadto kanila ug mibahad nga pusilon ang mga polis nga modakop kaniya, apan sa iyang pag-ikyas gipusil kini ug naigo sa tuo nga paa.
Dali siyang gidala sa Lapu-Lapu City District Hospital.
Nakuha kaniya ang 150 ka pakete nga shabu nga gibanabanang P15mil ang kantidad ug ang .357 revolver nga adunay lima ka buhing bala, usa ka cellphone ug drug paraphernalia.
Nadakpan ang mga batabata niini nga sila si Jason Duran taga Barangay Apas, Cebu City; Elineo Hitso ug Henry Baguio, pulos mga residente sa Barangay Pajo.
Samtang usa ka gipasanginlang drug pusher nga giila nga si Benjamin Villamonte Mallari, 49, ang nadakpan sa buy-bust operation sa barangay Matab-ang dakbayan sa Toledo.
Si Mallari nadakpan sa grupo ni Inspector Jovito Labra human siya napalitan og usa ka paketeng shabu, dugang nakuha kaniya ang usa ka dako, usa ka medium size ug gamay nga paketeng may sud nga gidudahang shabu.
Nadakpan usab diha sa Sitio Ampalaya, Barangay Cambaro, Dakbayan sa Mandaue ang usa ka Dandee Mandawe Capirol, 34, human kini napalitan og shabu sa grupo ni Senior Inspector Jimmy Portes. Nakuha kaniya ang tulo ka paketeng may sud nga gidudahang shabu. (Christell Fatima Tudtud, ug report nila ni Raymond Abarcas ug Romeo T. Limpangog/EIM) (BANAT NEWS)
- Latest
