Mga doctor, staff sa MCH ipakiha — DOH
CEBU, Philippines - Mipagawas og rekomendasyon ang Department of Health Central Visayas nga pasakaan og mga kaso ang mga doctor ug nurses nga niatiman sa ginang nga misteryosong namatay sa Mandaue City Hospital.
Gitug-an ni Atty. Inocencio Dela Cerna, abogado ni Cesar Coliflores, ang bana sa namatay nga si Jocelyn niadtong Enero 2 ning tuiga.
Matud ni Dela Cerna ang DOH-7 mihatag kanila sa kopya sa investigation report ug didto nalatid sa report ang mga rekomendasyon nga pasakaan og kasong medical malpractice ngadto sa Professional Regulation Commission ang mga doktor ug medical staff sa MCH.
Girekomendar usab ang pagpahigayon og re-autopsy sa patay’ng lawas ni Jocelyn, lakip na usab ang pagpasaka og administrative complaint ngadto sa kagamhanan sa siyudad sa Mandaue batok sa mga gireklamo nga mga medical personnel.
Dugang rekomendasyon gikan sa DOH-7, kinahanglang mohimo g’yud og laboratory test sa ilang pasyente samtang anaa pa sila sa Emergency Room una ibalhin sa medical ward ug kinahanglan usa lang ka discharge summary ang ipagawas aron malikayan ang kalibog.
Ang maong report sa DOH-7 gitakda nga iduso sa pamilyang Coliflores didto sa National Bureau of Investigation nga ilang gidangpan.
Gihangyo usab ni Dela Cerna ang Mandaue City mopagawas na sa resulta sa ilang imbestigasyon.
Si Cesar Coliflores sa iyang bahin miingon nga nalipay siya tungod kay duna na siyay nakitang kahayag sa iyang pagpangita og hustisya sa nahitabo sa iyang asawa. (BANAT NEWS)
- Latest
