RSP Gubalane ikiha ni Tommy
CEBU, Philippines - Ikiha ni kanhi kongresista Tomas Osmeña si Regional State Prosecutor Fernando Gubalane kun dili bakwion ang kamandoan niya nga ang usa ka fiskal sa dakbayan sa Lapu-Lapu maoy mopahigayon sa preliminary hearing sa kaso’ng libel nga iyang gipasaka batok ni magsisibya Bobby Nalzaro.
Giaprobahan ni Gubalane ang hangyo ni Nalzaro nga did-an sila si Prosecutors Gandhi Truya ug Ma Thereza Casiño sa pagpahigayon og preliminary hearing kay natahap siya nga bayas ang duha pabor sa kanhi kongresista.
Matud ni Nalzaro nga usa siya sa nakapasuspenso kaniadto ni kanhi fiskal Crispulo Truya (amahan ni Prosecutor Gandhi Truya) ug nakadungog usab siya nga si Osmeña mitanyag og P300 mil nga tabang kang Casiñas diha nga napusilan kini kaniadto’ng 2013.
Tungod niini gitahasan ni Gubalane si Assistant Lapu-Lapu City Prosecutor Jesus Rodrigo Tagaan nga maoy modumala sa preliminary investigation sa kaso nga gipasaka ni Osmeña batok ni Nalzaro.
Si Osmeña miingon nga ang gahum ni Gubalane mao ra ang paghimo og administrative supervision ngadto sa mga fiskal sa mga dakbayan ug probinsya apan dili siya makahimo sa pagpanghilabot sa ilang tagsa-tagsa ka mga trabaho.
Gikutlo ni Osmeña ang hukom sa Supreme Court sa People vs. Garfin nga gipagawas kaniadto’ng Marso 29, 2004 nga maoy gibasehan niya sa pagpasaka og Motion for Reconsideration nga nag-awhag kang Gubalane pagbakwi sa iyang hukom.
Si Nalzaro miingon nga anaa ra kang Gubalane ang pagtimbang-timbang kun angay ba niya nga hatagan og gibug-aton ang Motion for Reconsideration nga gipasaka ni Osmeña.
Gipasakaan si Nalzaro og kaso’ng libel ni Osmeña tungod sa sinuwat niya sa mantalaan nga ang kanhi kongresista nagtumo-tumo og mga ebidensya nga gigamit niya pagpasaka og daghang kaso batok ni Cebu City Treasurer Diwa Cuevas aron kini mataktak sa katungdanan. (BANAT NEWS)
- Latest
