Pag-ayo sa maagian sa APEC leaders gipadali

CEBU, Philippines – Gipadali sa pagpaayo ang kadalanan nga maagian sa mga delegado sa Asia-Pacific Economic Cooperation (APEC) Summit sa Sugbo.

Matud sa pangulo sa Provincial Tourism Office, Grace Paulino, nga si Gobernador Hilario Davide III ang nimando sa Department of Public Works and Highways (DPWH) sa pagpadali sa pagpaayo sa mga karsada lakip na sa mga tourists sites.

Ang mga karsada nga gitutukan nga mapadali sa pagpaayo mao ang padulong sa Shangrila Hotel sa Mactan, Radisson Blu sa North Reclamation Area, Grand Convention Center sa Archbishop Reyes Avenue, Waterfront Hotel ug Marco Polo sa Lahug diin ipahigayun ang dagku’ng meeting sa APEC.

Sa niagi’ng tigum sa Kapitolyo, gipasalig sa DPWH nga sa dili pa ang adlaw sa pagpahigayun sa APEC mahuman na nila ang pag-ayo sa kadalanan.

Ang unang meeting sa APEC sa Sugbo gikatakda karong Agosto 24, 2015 hangtud sa Septiyembre 6, 2015.

Sundan kini sa Septiyembre 7,8 ug 9 ug Finance Ministerial Meeting sa 10 ug 11.

Sa Oktubre 8 ipahigayon ang Transportation Ministerial Meeting ug sa Oktubre 12 hangtud 14 ipahigayon ang Energy Ministerial Meeting.

Matud ni Paulino nga ang mga mayor sa dakbayan sa Sugbo, Mandaue ug Lapu-Lapu diin ipahigayun ang mga meetings ang nitabang usab sa preparasyon.

Lainlain nga komitiba ang giumol sama sa committee on security, media affairs, conference services, utility, road networks ug operations. – /GMR) (BANAT NEWS)