Tinda sa mga ambulant vendors ipasusi

CEBU, Philippines – Ipasusi sa kagamhanan sa probinsiya sa Sugbo ang mga pagkaon ug mainom nga gipamaligya sa mga ambulant vendors sa mga eskwelahan ug trabahoan.

Kini ang sugyot ni Bokal Miguel Antonio Magpale aron malikay sa sakit ang mga mopalit sa mga baligya.

Ang sugyot ni Magpale gihimo human sa insidente sa dakbayan sa Danao diin ubay-ubay nga mga kawani sa usa ka pabrika ang nagkalibanga tungod sa giingong kontaminado’ng tubig gikan sa tinubdan gawas sa kompaniya. Sa iyang bahin, si Bokal Thadeo Ouano nisugyot usab sa Integrated Provincial Health Office  ug Provincial Engineering Office sa paghatag og update sa status sa Cebu Provincial Water Laboratory.

Si Ouano nipasabot nga kinahanglan i-monitor ug i-evaluate ang nagkalain-laing tinubdan sa tubig pagsuta kung nakatuman ba sa national standards subay sa balaud. – /GMR) (BANAT NEWS)