P1.3M shabu gironda

CEBU, Philippines – Usa ka babayeng gipasanginlang “shabu queen” ang nasikop sa mga sakop sa City Intelligence Branch sa Sitio Buli, Barangay Duljo-Fatima samtang laing pito ka lalaki ang nadakpan usab sa laing drug operations sa Barangay Guadalupe ning dakbayan sa Sugbo.

Nasakmit sa kapolisan ang gibanabanang kapin P1 milyon nga shabu gikan sa maong mga operasyon.

Ang dinakpan giila nga si Emelyn Babano Dingal, 49, minyo ug nagpuyo sa maong lugar, gikatahong makabaligya og usa ka kilo nga shabu matag semana ug matawag na kining “shabu queen” tungod kay siya lang maoy dinaghan og mabaligyang shabu sa maong dapit.

Matud pa sa hepe sa City Intelligence Branch sa Cebu City Police Office nga si Superintendent Romeo Santander sa Banat News dunay misumbong kanila bahin sa operasyon ni Dingal ug nakompirmar kini sa ilang surveillance operation.

Ang poseur buyer mipalit og P2mil nga shabu ug dihang nakompleto ang transaksyon gidakop dayon kini ug gisud ilang balay. Diha nakita ang mas daghan pang mga drugas nga nagtibugol pa.

“Nakurat mi pagtan-aw namo sa drugs tibugol pa kaayo wala pa nadugmok, murag bag-o pa naabot niya nga supply,” matud pa ni Santander.

Apan matud pa ni Santander, gawas nga mamaligya, huloganan usab si Dingal og drugas nga iyaha usab i-repack.

Usa ka medium, tulo ka dagku ug 30 ka gagmay nga mga pinutos nga gituohang shabu ang nakuha sa kapolisan     nga mikantidad og P1,300,000, ug cash nga P23,000 ug usa ka timbangan sa drugas.

“Tungod sa kalisod, kapit sa patalim, ana ra man g’yud nang panahon, practical, unya miabot naman ang panahon nga madakpan ta,” sigun pa ni Dingal dihang nahinabi sa Banat News.

Matud niya usa pa siya ka tuig namaligya niini ug kalmado kaayong miingon nga naabot na siguro ang iyang panahon nga madakpan siya.

Nakakuha usab ang kapolisan og upat ka gambling machines sa tupad nga balay sa suspek apan way nadakpang operator niini.

Samtang ang Guadalupe Police nakadakop sa gipasanginlang drug pusher nga si Lordnoe Vargas, 28, pinasikad sa search warrant nga giisyu ni RTC Judge Gilbert Moises tungod gihapon sa illegal nga drugas.

Ang operasyon gipangulohan ni Senior Inspector Allan Rosario diha sa Unit 2, Oppra, Barangay Kalunasan .

Lakip sa nasikop ang igsoon sa suspetsado ug laing lima ka mga lalaki nga nakuhaan sab og drug paraphernalia.

Naila ang mga nasikop nga sila si Anthony Vargas, 37, Michael Alesna, 22, Remy Enarlan, 25,  Ruzz Lord Espinoza, 29 ug Marlon Mulig, 39.

Nakuha sa kapulisan ang 12 ka ampoules nga Nubain ug 15 ka gagmay nga paketeng gituohang shabu. – /EIM) (BANAT NEWS)