P7M shabu nasakmit

CEBU, Philippines - Mokabat sa pito ka milyon ka pesos nga kantidad sa drugas ang nasakmit sa mga sakop sa Regional Anti-Illegal Drugs Special Operations Group-7 (RAIDSOTG-7) gikan sa usa ka level 2 drug pusher sa Tres de Abril, Labangon ning dakbayan kagahapon sa hapon.

Ang kapulisan misikop ni Jonathan Cañada, 40, nagpuyo sa maong lugar.

Matud pa ni Senior Inspector Joey Bicoy ang team leader sa RAIDSOTG-7 nga nahinabi sa Banat News usa ka semana nilang gi-monitor ang kalihokan ni Cañada tungod sa impormasyon nga namaligya kini og drugas. Sumala pa ni Bicoy nga gikan sa “Munti Boys” ang supply niini sa drugas.

Sumala pa nga gi-contact nila si Cañada pinaagi sa cell phone nga mo-order ang poseur buyer og 100 ka gramos nga drugas, mikubit kini dayon ug misaad nga iyang mahatag ang gi-order.

Gamit ang P150 mil nga budol money napalitan og drugas ang suspek ug human niya natunol ang drugas gidakop kini dayon.

Sa pagsubay sa kapulisan sa balay sa suspetsado ila pa nga nakuha ang laing daku nga putos sa gituohang shabu nga mitimbang tanan og 600 gramos nga mokantidad og P7, 080, 000. Si Bicoy miingon nga usa sa ilang gisubay karon ang impormasyon nga matud pa striker sa Civil Security Group ang dinakpan. Mao kini ang kinadak-ang operasyon nga nahimo sa kapulisan karong tuiga. (Jojo C. Ugdol/EIM)(BANAT NEWS)