‘Drug pusher’ patay

CEBU, Philippines - Maayong pagkabuak sa ulo sa usa ka 25- anyos nga lalaki nga gidudahang tigpayuhot og ilegal nga drugas human gikatahong nakigpinusilay sa mga polis sa lungsod sa Argao kagahapon sa alas 4 sa hapon.

Ang mga polis mo-serve unta og search warrant diha sa balay sa suspek nga si Fritchie Gecala diha sa barangay Talo-ot lungsod sa Argao apan gikatahong misukol kini sa mga polis.

Matud pa ni Senior Inspector Alejandro Batobalonos ang hepe sa Argao Police nga nahinabi sa Banat News  ilaha untang  rondahon ang balay sa suspek pinasikad sa search warrant nga gi-isyu ni RTC Judge Maximo Perez sa Branch 26, tungod sa paghupot og illegal drugs.

Matud pa ni Batobalonos, wa sila mokompiyansa tungod kay base sa ilang impormasyon armado ug mosukol og polis ang suspetsado.

Kauban ni Batobalonos ang mga sakop sa Special Weapons and Tactics (SWAT) sa Argao nga mao’y nagsilbing blocking force.

Pag-abot nila sa balay sa suspetsado ilang nakita sa gawas si Gecala ug ilang giingnan nga duna sila’y dala nga search warrant apan dali kini nga misulod sa balay ug pagsunod sa mga polis, gisugat sila og mga bala niini. Matud pa ni Batobalonos nga mihadiyong sa iyang ulo ang bala ug swerte na lang kay wala sila maigo.

“Milabay sa akong ulo ang bala, hapit g’yud mao ‘to mibalos na lang pud mi kay nakita man namo ang ulo niya,” sigun pa ni Batobalonos.

Sulod sa balay ni Gecala nakuha sa kapulisan ang .45 pistol nga gigamit sa suspetsado lakip na sa usa ka granada ug mga drugas nga mikantidad sa P147,500.

Kini sab mihangyo sa katawhan sa Argao ilabi na kadtong silbihan og search warrant sa kapulisan nga dili na gayod mosukol aron dili madisgrasya.(Jojo C. Ugdol/EIM)(BANAT NEWS)