‘Police brutality’

CEBU, Philippines - Usa ka police ang giimbestigar human gipasanginlan nga nangulata og 24-anyos nga lalaki nga gidudahang nangawat sa ilang balay sa Barangay Bulacao ning dakbayan sa Sugbo niadtong Domingo sa kaadlawon.

Si Police Officer 2 Romeo Cabulao nga nadestino sa Guadalupe Police Station gipasanginlan nga mikulata ni Joe Henry Bagul taga Sitio Pwesto, Barangay Napo dakbayan sa Carcar.

Gipasanginlan si Bagul nga nangawat sa tablet ug cellphone sa anak ni Cabulao sulod sa ilang balay, apan sa pagkasikop kaniya way narekober nga mga butang atol sa pagkulata.

Naguol ang mga ginikanan ni Bagul tungod kay posibleng tangtangon ang usa ka mata sa ilang anak tungod sa grabeng kadaot nga namugna sa pagpangulata kaniya sa polis ug sa mga estambay, si Bagul anaa karon sa Vicente Sotto Memorial Medical Center.

Ang pamilyang Bagul midangop sa buhatan sa Regional Investigation and Detection Management Division sa Police Regional Office-7.

Sumala pa sa inahan nga ang unang mikulata sa iyang anak mao si Cabulao ug dayon misunod ang mga estambay.

Ang amahan sa biktima nga si Diomedes miingon nga duna sila’y testigos nga magpamatuod nga si Cabulao mikulata sa iyang anak. Sumala pa sa amahan, bisan sa ilang kakabus, dili sila mga kawatan. Si Cabulao sa iyang bahin hugtanon nga mihimakak sa maong pasangil ug nangrason nga wa siya sa lugar sa dihang nahitabo ang pagpangulata.

“Di ko katubag sa bun-og niya. Wa g’yud ko diha. Taongbayan na nagkuan (nagkulata) niya. Imposible nga ako. Wala g’yud ko’y labot,” panghimakak pa sa maong polis.

Ang Deputy Chief sa RIDMD nga si Supt. Henry Biñas miingon nga ilang imbestigahon si Cabulao kun mapamatud-ang sad-an, mag-atubang siya og kasong administratiba tungod sa grave misconduct. (Jojo C. Ugdol/EIM)(BANAT NEWS)