Polis namusil og iro gireklamo

CEBU, Philippines - Usa ka polis ang gireklamo sa iyang silingan human niini gipusil ang usa ka iro gamit ang iyang service firearm diha sa ilang dapit sa Sitio San Jose, Barangay Guizo sa dakbayan sa Mandaue.

Ang gireklamo nga polis diha sa Regional Investigation Detection and Management Division-7 giila nga si Police Officer 1 Ronaldo Napigkit, 28, nadestino sa Lapu-Lapu Police Office. Ang mireklamo mao si Rosalie Mahinay, 37, tag-iya sa iro nga “Aspin” o Asong Pinoy nga giingong gipusil ni Napigkit niadtong Pebrero 14 ning tuiga.

Matud pa nga ikaduha na kining higayon nga gipusil sa maong polis ang iyang iro. Niadtong unang pagpamusil sa miaging tuig, nabuta ang iro human napiskan sa splinter ang mata niini. Ug ning uwahi nasamdan sa dunggan ang iro human giusban pagpusil ni Napigkit gamit ang .9mm pistol niini nga iyang service firearm.

Apan si Napigkit miingon nga napugos siya pagpusil niini kay paakon na siya  sa iro.  Matud niya, duna na siya’y phobia sa iro human napaakan sa dihang nag-edad pa siya og 12-anyos ug gigukod usab siya og iro dihang 9-anyos pa siya. Apan nangangkon siya nga usa siya ka ‘dog lover’ kay duna ‘sab siya’y binuhi nga Labrador ug Aspin.

Ang hepe sa RIDMD nga si Senior Superintendent Rey Lyndon Lawas moimbestigar kang Napigkit sa maong hitabo, apan nakita ni Lawas nga duna kini nahimong kalapasan. (BANAT NEWS)