Davide nanalipod sa komitiba ni Sitoy
CEBU, Philippines – Giklaro ni Gob. Hilario Davide III nga tanang reklamo nga giduso sa committee on complaints and investigation sa hunta probinsiyal ang gihatagan og pagtagad.
Matud ni Davide nga dili lang ang reklamo batok kang Mayor Nelson Garcia sa Dumanjug ang gisentro sa imbestigasyon.
Si Garcia una’ng nireklamo nga wala atimana sa komitiba nga gipangulohan ni Bokal Arleigh Sitoy ang mga kaso nga iya’ng gipasaka batok kang Bise Mayor Efren Guntrano Gica.
Apan matud ni Davide nga si Bise Gob. Agnes Magpale ug Bokal Grecilda Sanchez nihangyo kaniya nga magdugang og tawo sa buhatan nga makatabang og atiman sa mga kaso nga gisang-at sa komitiba.
Gibutyag ni Davide nga dunay usa ka abogado ang gi-hire isip consultant aron makatabang sa pagresolba sa mga kaso’ng gisang-at sa komitiba.
Gi-withdraw ni Garcia ang upat ka kaso’ng administratiba nga iyang gipasaka batok ni Gica nunot sa giingo’ng wala pagtagad sa komitiba ni Sitoy.
Gitumbok ni Garcia nga dili makiangayon ang desisyon sa komitiba nga gilangkuban sa pulos sakop sa Liberal Party nga kaalyado ni Gica samtang siya sakop sa oposisyon nga One Cebu Party.
Si Garcia nipasangil nga ang gihatagan lang og pagtagad sa komitiba ang reklamo nga gipasaka ni Gica batok kaniya. – /GMR) (BANAT NEWS)
- Latest
